2020 മാർച്ച് 26ന് പുറപ്പെടുവിച്ച കേരള പകർച്ചവ്യാധി ഓർഡിനൻസ് 2020 ഭേദഗതി ചെയ്തു. 2020 ജൂലൈ 3ന് പുറപ്പെടുവിച്ച കേരള പകർച്ചവ്യാധി (ഭേദഗതി) ഓർഡിനന്‍സ് 2020 ആണ് ഇനി പ്രാബല്യത്തിലുണ്ടാവുക. ഇതനുസരിച്ച് കോവിഡ് നിയന്ത്രണങ്ങൾ 2021 ജൂലൈ വരെയോ സർക്കാർ മറിച്ചൊരു തീരുമാനമെടുക്കുന്നതു വരെയോ നിലവിലുണ്ടാവും.
1. തൊഴിലിടങ്ങൾ അടക്കം പൊതുജനങ്ങൾ കൂട്ടമായെത്താനിടയുള്ള എല്ലായിടങ്ങളിലും വാഹനയാത്രാ വേളയിലും വായും മൂക്കും മറയുന്ന രീതിയിൽ മാസ്ക് നിർബന്ധം.
2. പൊതു ഇടങ്ങളിലും ചടങ്ങുകളിലും രണ്ടു പേർ തമ്മിൽ ആറടി സാമൂഹിക അകലം സൂക്ഷിക്കണം.
3. വിവാഹ ചടങ്ങുകളിൽ പങ്കെടുക്കുന്നവരുടെ എണ്ണം 50ൽ കൂടരുത്. സാനിറ്റൈസർ, മാസ്ക്, സാമൂഹിക അകലം എന്നിവ നിർബന്ധം.
4. മരണാനന്തര ചടങ്ങുകളിൽ പങ്കെടുക്കുന്നവരുടെ എണ്ണം 20ൽ കൂടരുത്. സാനിറ്റൈസർ, മാസ്ക്, സാമൂഹിക അകലം എന്നിവ നിർബന്ധം. കോവിഡ് ബാധിച്ചാണ് മരണമെന്നു സംശയമുണ്ടെങ്കിൽ കേന്ദ്ര -സംസ്ഥാന സർക്കാരുകൾ നിർദ്ദേശിച്ചിട്ടുള്ള നടപടിക്രമങ്ങൾ പാലിക്കണം.
5. ബന്ധപ്പെട്ട അധികാരകേന്ദ്രത്തിൽ നിന്നു രേഖാമൂലം അനുമതിയില്ലാതെ സൽക്കാരം, ഘോഷയാത്ര, ധർണ്ണ, മതപരമായ ചടങ്ങ്, പ്രകടനം എന്നിവയൊന്നും നടത്താൻ പാടില്ല. ഇത്തരം ഒത്തുചേരലുകളിൽ പങ്കെടുക്കുന്നവരുടെ എണ്ണം 10ൽ കൂടരുത്. സാനിറ്റൈസർ, മാസ്ക്, സാമൂഹിക അകലം എന്നിവ നിർബന്ധം.
6. വ്യാപാര -വാണിജ്യ സമുച്ചയങ്ങളിൽ ഒരു സമയം പ്രവേശിപ്പിക്കാവുന്ന ഇടപാടുകാരുടെ എണ്ണം മുറിയുടെ വലിപ്പമനുസരിച്ച് പരമാവധി 20 ആണ്. ഇവർ മാസ്ക് ധരിക്കുകയും സാമൂഹിക അകലം പാലിക്കുകയും വേണം. സാനിറ്റൈസർ സ്ഥാപനയുടമ നൽകണം.
7. പൊതു ഇടങ്ങളിലോ നടപ്പാതയിലോ റോഡിലോ തുപ്പരുത്.
8. വിദേശ രാജ്യങ്ങളിൽ നിന്നോ ഇന്ത്യയിലെ ഇതര സംസ്ഥാനങ്ങളിൽ നിന്നോ കേന്ദ്ര ഭരണ പ്രദേശങ്ങളിൽ നിന്നോ കേരളത്തിലേക്കു വരുന്നവർ കേരള സർക്കാർ സജ്ജീകരിച്ചിട്ടുള്ള കോവിഡ് -19 ജാഗ്രത പോർട്ടലിൽ തങ്ങളുടെ വിവരം നിർബന്ധമായും നൽകണം. സമ്പർക്ക പരിശോധന, ക്വാറന്റൈൻ തുടങ്ങിയ നടപടികൾ സുഗമമാക്കാൻ ഇതാവശ്യമാണ്.
9. റോഡ് മുഖേനയുള്ള സംസ്ഥാനാന്തര പൊതുഗതാഗതം നിർത്തിവെച്ചിരിക്കുന്നു. കെ.എസ്.ആർ.ടി.സിയുടെ നേതൃത്വത്തിലുള്ള പൊതുമേഖലയ്ക്കും സ്വകാര്യ മേഖലയ്ക്കും ഇതു ബാധകം.
നിയന്ത്രണങ്ങൾ ലംഘിക്കുന്നത് കേരള പകർച്ചവ്യാധി (ഭേദഗതി) ഓർഡിനന്‍സ് 2020 പ്രകാരം ശിക്ഷാർഹമാണ്. ഓർഡിനൻസ് കൃത്യമായി നടപ്പാക്കുന്നു എന്നുറപ്പാക്കാൻ ജില്ലാ കളക്ടർമാർക്ക് നിർദ്ദേശം നൽകിയിട്ടുണ്ട്.
