മൗസും ട്രാക്ക്പാഡും കീബോർഡും ചേർന്ന പരമ്പരാഗത മാക് അനുഭവത്തിലേക്ക് ഇനി വിരൽത്തുമ്പും എത്തുന്നു. ചരിത്രത്തിലാദ്യമായി ടച്ച്‌സ്‌ക്രീനുള്ള മാക്‌ബുക്ക് അവതരിപ്പിക്കാൻ ആപ്പിൾ ഒരുങ്ങുകയാണ്. പുതിയ തലമുറ ഐപാഡ് മിനി, എം6 ചിപ്പുള്ള 14 ഇഞ്ച് മാക്‌ബുക്ക് പ്രോ, ഐമാക് എന്നിവയും ഒക്ടോബർ അവസാനത്തോടെ അവതരിപ്പിക്കാനാണ് കമ്പനിയുടെ പദ്ധതി.
ഒക്ടോബർ 27നോ അതിനോട് ചേർന്ന ദിവസങ്ങളിലോ പുതിയ ഉത്പന്നങ്ങൾ അവതരിപ്പിക്കാനാണ് ഇപ്പോഴത്തെ പദ്ധതി. ഇതോടെ ഒക്ടോബറിൽ തന്നെ രണ്ടാമത്തെ വലിയ ഉത്പന്ന പ്രഖ്യാപനത്തിനാണ് ആപ്പിൾ തയ്യാറെടുക്കുന്നത്. ഒക്ടോബർ 13ന് സ്മാർട്ട് ഹോം ഉത്പന്നങ്ങൾ കേന്ദ്രീകരിച്ചുള്ള മറ്റൊരു അവതരണവും കമ്പനി നടത്താനിരിക്കുകയാണ്.
മാക്കിന്റെ ചരിത്രത്തിലെ വലിയ വഴിത്തിരിവ്
ടച്ച്‌സ്‌ക്രീൻ ലാപ്ടോപ് എന്ന ആശയത്തിൽനിന്ന് വർഷങ്ങളായി മാറിനിന്ന കമ്പനിയാണ് ആപ്പിൾ. ഐഫോണിലും ഐപാഡിലും സ്പർശനിയന്ത്രണം അടിസ്ഥാന സാങ്കേതികവിദ്യയാക്കിയപ്പോഴും മാക്‌ബുക്കിൽ കീബോർഡ്, ട്രാക്ക്പാഡ് എന്നിവയ്ക്കാണ് കമ്പനി മുൻഗണന നൽകിയത്. 2010ൽ തന്നെ ലാപ്‌ടോപ്പിന്റെ നേർവശത്തുള്ള സ്ക്രീനിൽ ദീർഘനേരം സ്പർശിച്ച് പ്രവർത്തിക്കുന്നത് സൗകര്യപ്രദമല്ലെന്ന നിലപാടാണ് സ്റ്റീവ് ജോബ്‌സ് മുന്നോട്ടുവച്ചത്. മൾട്ടിടച്ച് നിയന്ത്രണത്തിന് ട്രാക്ക്പാഡാണ് മികച്ച മാർഗമെന്നും അദ്ദേഹം വ്യക്തമാക്കിയിരുന്നു.
16 വർഷത്തിനുശേഷം ആ നിലപാടിൽ ആപ്പിൾ വലിയ മാറ്റത്തിനൊരുങ്ങുന്നതാണ് പുതിയ മാക്‌ബുക്കിന്റെ പ്രധാന്യം. മാക്കിനെ പൂർണമായും ഐപാഡാക്കി മാറ്റുകയല്ല ലക്ഷ്യം. കീബോർഡും ട്രാക്ക്പാഡും തുടരും; അവയ്ക്കൊപ്പം ആവശ്യമായപ്പോൾ സ്ക്രീനിൽ നേരിട്ട് സ്പർശിച്ച് നിയന്ത്രിക്കാനുള്ള മൂന്നാമത്തെ മാർഗമാണ് ചേർക്കുന്നത്. മൗസ്, ട്രാക്ക്പാഡ്, ടച്ച് എന്നിവ ഒരുമിച്ച് ഉപയോഗിക്കാവുന്ന സംവിധാനത്തിലേക്കാണ് മാക് നീങ്ങുന്നത്. ഈ ഗണത്തിലുള്ള വിൻഡോസ് ലാപ്ടോപ്പുകൾക്കു ലഭിക്കുന്ന വമ്പിച്ച ജനപ്രീതിയാണ് ആപ്പിളിനെ മാറിച്ചിന്തിക്കാൻ പ്രേരിപ്പിച്ചത്.
OLED സ്ക്രീനിലേക്ക് മാക്‌ബുക്ക് പ്രോ
ടച്ച്‌സ്‌ക്രീൻ മാത്രമല്ല പുതിയ മാക്‌ബുക്ക് പ്രോയുടെ മാറ്റം. 14 ഇഞ്ച്, 16 ഇഞ്ച് വലുപ്പങ്ങളിലുള്ള ഉയർന്ന ശ്രേണിയിലെ മാക്‌ബുക്ക് പ്രോ മോഡലുകളിൽ OLED ഡിസ്പ്ലേ വരുമെന്നാണ് റിപ്പോർട്ടുകൾ. ഇപ്പോഴത്തെ മിനി-എൽഇഡി സ്ക്രീനിൽനിന്നുള്ള വലിയ സാങ്കേതികമാറ്റമാണിത്. കൂടുതൽ ആഴമുള്ള കറുപ്പ്, മെച്ചപ്പെട്ട കോൺട്രാസ്റ്റ്, ഓരോ പിക്സലിന്റെയും പ്രകാശം പ്രത്യേകം നിയന്ത്രിക്കാനുള്ള കഴിവ് എന്നിവയാണ് OLED സാങ്കേതികവിദ്യയുടെ പ്രധാന നേട്ടങ്ങൾ.
സ്ക്രീനിനുള്ളിൽതന്നെ ടച്ച് സെൻസർ ഉൾപ്പെടുത്തുന്ന സംവിധാനമാണ് പ്രതീക്ഷിക്കുന്നത്. ഇതിലൂടെ ഡിസ്പ്ലേ ഘടകത്തിന്റെ കനം കുറയ്ക്കാനാകും. നിലവിലെ മോഡലുകളേക്കാൾ പുതിയ മാക്‌ബുക്ക് പ്രോ ഗണ്യമായി ഭാരം കുറഞ്ഞതായിരിക്കുമെന്നും വിവരമുണ്ട്.
‘നോച്ച്’ മാറി ഡൈനാമിക് ഐലൻഡ്
ഐഫോണിലൂടെ പരിചിതമായ ഡൈനാമിക് ഐലൻഡ് മാക്‌ബുക്കിലേക്കും എത്തുമെന്നാണ് മറ്റൊരു പ്രധാന സൂചന. ഇപ്പോഴത്തെ മാക്‌ബുക്ക് പ്രോ സ്ക്രീനിന്റെ മുകളിലുള്ള നോച്ചിന് പകരം ക്യാമറയ്ക്കായി ചെറിയ സുഷിരവും അതിനു ചുറ്റുമായി ആവശ്യാനുസരണം വിവരങ്ങൾ പ്രദർശിപ്പിക്കുന്ന ഡൈനാമിക് ഐലൻഡ് സംവിധാനവുമാണ് പ്രതീക്ഷിക്കുന്നത്.
ഐഫോണിൽ അറിയിപ്പുകളും പശ്ചാത്തലപ്രവർത്തനങ്ങളും കാണിക്കുന്ന ഡൈനാമിക് ഐലൻഡ്, മാക്കിൽ എങ്ങനെയായിരിക്കും ഉപയോഗിക്കുക എന്നതാണ് കൗതുകം. ആപ്പുകൾക്കും സിസ്റ്റം പ്രവർത്തനങ്ങൾക്കും അനുസരിച്ച് ഇതിന്റെ രൂപവും വിവരങ്ങളും മാറുന്ന രീതിയിലാണ് ആപ്പിൾ പരീക്ഷണം നടത്തുന്നതെന്നാണ് റിപ്പോർട്ടുകൾ.
ടച്ചിനൊപ്പം മാറും മാക് ഒഎസും
ഹാർഡ്‌വെയറിൽ ടച്ച്‌സ്‌ക്രീൻ ചേർക്കുന്നതുകൊണ്ട് മാത്രം കാര്യമില്ല. വിരൽ ഉപയോഗിച്ച് എളുപ്പത്തിൽ നിയന്ത്രിക്കാവുന്ന വിധത്തിൽ മാക് ഒഎസിലും മാറ്റം ആവശ്യമാണ്. അതിനായി ആപ്പിൾ മാക് ഒഎസിലെ ചില നിയന്ത്രണങ്ങൾ ടച്ചിന് അനുകൂലമാക്കുന്നുണ്ടെന്നാണ് വിവരം.
ഉപയോക്താവ് വിരൽ ഉപയോഗിച്ച് ഒരു മെനുവിൽ സ്പർശിക്കുമ്പോൾ അതിലെ നിയന്ത്രണങ്ങൾ വലുതായി ദൃശ്യമാകുക, പിഞ്ച് ചെയ്ത് സൂം ചെയ്യുക, വിരൽ ഉപയോഗിച്ച് വേഗത്തിൽ സ്ക്രോൾ ചെയ്യുക തുടങ്ങിയ സൗകര്യങ്ങൾ ഉൾപ്പെടുത്താനാണ് പദ്ധതി. അതേസമയം നിലവിലെ മാക് അനുഭവത്തിന്റെ അടിസ്ഥാനമായ കീബോർഡിനെയും ട്രാക്ക്പാഡിനെയും ഒഴിവാക്കില്ല. ടച്ച് നിർബന്ധമാക്കാതെ ഉപയോക്താവിന് സൗകര്യാനുസരണം തിരഞ്ഞെടുക്കാനാവുന്ന രീതിയാണ് ആപ്പിൾ പിന്തുടരുന്നതെന്നാണ് റിപ്പോർട്ട്.
ഇതാണ് ഐപാഡും മാക്കും തമ്മിലുള്ള അതിർത്തി കൂടുതൽ നേർത്തതാക്കുന്നത്. ഐപാഡിൽ കീബോർഡും ട്രാക്ക്പാഡും ചേർത്ത് അതിനെ ലാപ്‌ടോപ്പിനോട് അടുപ്പിച്ച ആപ്പിൾ, ഇപ്പോൾ മാക്കിലേക്ക് ടച്ച് കൊണ്ടുവന്ന് മറുവശത്തുനിന്നും അതേ അകലം കുറയ്ക്കുകയാണ്.
എം6 എത്തുന്ന മാക്‌ബുക്ക് പ്രോയും ഐമാക്കും
ഒക്ടോബർ അവസാനത്തെ പ്രഖ്യാപനത്തിലെ മറ്റൊരു പ്രധാന ആകർഷണം ആപ്പിളിന്റെ പുതിയ എം6 ചിപ്പ് ആയിരിക്കും. എം6 അടിസ്ഥാനമാക്കിയ 14 ഇഞ്ച് മാക്‌ബുക്ക് പ്രോയും ഐമാക്കും പ്രഖ്യാപിക്കുമെന്നാണ് സൂചന.
ടച്ച്‌സ്‌ക്രീനും OLED ഡിസ്പ്ലേയും ഉൾപ്പെടുന്ന ഉയർന്ന ശ്രേണിയിലെ മാക്‌ബുക്ക് പ്രോ മോഡലുകളിൽനിന്ന് വ്യത്യസ്തമായി, നിലവിലെ രൂപകല്പന തുടരുന്ന അടിസ്ഥാന 14 ഇഞ്ച് മാക്‌ബുക്ക് പ്രോയിലാണ് എം6 ആദ്യം എത്തുകയെന്നാണ് തുടർറിപ്പോർട്ടുകൾ. 24 ഇഞ്ച് ഐമാക്കിലും പുതിയ ചിപ്പ് എത്തും. ആപ്പിളിന്റെ സ്വന്തം സിലിക്കൺ ചിപ്പുകളുടെ ആറാം തലമുറയായ എം6, മാക്കുകളുടെ പ്രവർത്തനക്ഷമതയിലും വൈദ്യുതി ഉപയോഗത്തിലും നിർമിതബുദ്ധി പ്രവർത്തനങ്ങളിലുമുള്ള അടുത്ത മുന്നേറ്റത്തിന്റെ അടിത്തറയാകും.
ചെറുതായിരിക്കും, മാറ്റങ്ങൾ വലുതാകും ഐപാഡ് മിനിയിൽ
പുതിയ ഐപാഡ് മിനിയും ഒക്ടോബർ അവസാനത്തെ പ്രഖ്യാപനത്തിലെ പ്രധാന ഉത്പന്നമാണ്. ചെറിയ സ്ക്രീനുള്ള ഐപാഡിനെ ഇഷ്ടപ്പെടുന്നവർക്കായി 2024നുശേഷമുള്ള പ്രധാന പുതുക്കലായിരിക്കും ഇത്.
പുതിയ മോഡലിൽ OLED ഡിസ്പ്ലേ ഉപയോഗിക്കുമെന്നാണ് റിപ്പോർട്ട്. വീഡിയോ കോളുകൾക്ക് കൂടുതൽ സൗകര്യമാകുന്ന വിധത്തിൽ മുൻ ക്യാമറ ലാൻഡ്‌സ്‌കേപ് വശത്തേക്ക് മാറ്റുകയും സ്പീക്കർ സംവിധാനം പുനർരൂപകല്പന ചെയ്യുകയും ചെയ്യുമെന്ന് സൂചനയുണ്ട്.
ഐപാഡ് മിനിയിൽ OLED എത്തുന്നത് നിറങ്ങളുടെ കൃത്യതയും കോൺട്രാസ്റ്റും മെച്ചപ്പെടുത്തുന്നതിനൊപ്പം സിനിമ കാണുന്നതിനും വായനയ്ക്കും ചിത്രസംസ്കരണത്തിനും കൂടുതൽ മികച്ച ദൃശ്യാനുഭവം നൽകാൻ സഹായിക്കും. ചെറിയ വലിപ്പത്തിൽ ശക്തമായ ഐപാഡ് ആവശ്യപ്പെടുന്നവരെ ലക്ഷ്യമിടുന്ന ഉത്പന്നമായി മിനിയെ കൂടുതൽ ശക്തിപ്പെടുത്തുകയാണ് ഇതിലൂടെ ആപ്പിൾ.
ഒക്ടോബറിൽ 2 ഘട്ടം
ആപ്പിളിനെ സംബന്ധിച്ചിടത്തോളം 2026 ഒക്ടോബർ തിരക്കേറിയ ഉത്പന്നമാസമായി മാറുകയാണ്. ഒക്ടോബർ 13ലെ ആദ്യ ഘട്ടത്തിൽ സ്മാർട്ട് ഹോം തന്ത്രത്തിനാണ് ഊന്നൽ. പുതിയ ഹോം ഹബ്, ഹോംപോഡ് മിനി, ആപ്പിൾ ടിവി തുടങ്ങിയവയാണ് അവിടെ പ്രതീക്ഷിക്കുന്നത്. തുടർന്ന് ഒക്ടോബർ 27ഓടെ മാക്, ഐപാഡ് ഉത്പന്നങ്ങളുടെ രണ്ടാംഘട്ടം വരും.
ഒക്ടോബർ 27, 28 തീയതികളിൽ ലോസ് ആഞ്ജലിസിൽ മാധ്യമപ്രവർത്തകർക്കും കണ്ടന്റ് ക്രിയേറ്റർമാർക്കും പുതിയ മാക്കുകളും ഐപാഡ് മിനിയും നേരിട്ട് പരീക്ഷിക്കാനുള്ള പ്രത്യേക പരിപാടി നടത്താനും ആപ്പിൾ പദ്ധതിയിടുന്നതായി ഏറ്റവും പുതിയ റിപ്പോർട്ടുകൾ പറയുന്നു. പരമ്പരാഗതമായി വലിയ വേദിയിൽ നടത്തുന്ന തത്സമയ ‘ആപ്പിൾ ഇവന്റ്’ എന്നതിനുപകരം ഓൺലൈൻ അവതരണവും നേരിട്ടുള്ള ഉത്പന്നപരിചയ പരിപാടിയും ചേർന്ന രീതിയായിരിക്കും ഉണ്ടാകുക.
മാക്കും ഐപാഡും തമ്മിലുള്ള രേഖ മങ്ങുന്നു
ആപ്പിളിന്റെ പുതിയ നീക്കത്തിന്റെ ഏറ്റവും വലിയ പ്രാധാന്യം ഒരു ടച്ച്‌സ്‌ക്രീൻ കൂട്ടിച്ചേർക്കുന്നു എന്നതിലല്ല. കമ്പനിയുടെ 2 പ്രധാന കംപ്യൂട്ടിങ് പ്ലാറ്റ്‌ഫോമുകളായ മാക്കും ഐപാഡും തമ്മിലുള്ള ബന്ധം പുനർനിർവചിക്കുന്നതിലാണ്.
ഐപാഡിന് മാജിക് കീബോർഡ്, ട്രാക്ക്പാഡ്, ഡെസ്‌ക്ടോപ് സ്വഭാവമുള്ള മൾട്ടിടാസ്‌കിങ് തുടങ്ങിയവ നൽകിയതോടെ അത് ക്രമേണ ലാപ്‌ടോപ്പിനോട് അടുത്തിരുന്നു. എന്നാൽ മാക്കിൽ ടച്ച്‌സ്‌ക്രീൻ നൽകാതെ രണ്ടിനും ഇടയിൽ വ്യക്തമായ വേർതിരിവ് ആപ്പിൾ സൂക്ഷിച്ചു. ആ അവസാന മതിലാണ് ഇപ്പോൾ ഇടിഞ്ഞുവീഴാൻ പോകുന്നത്.
എങ്കിലും മാക്‌ബുക്കിനെ ടച്ച് കേന്ദ്രീകൃത ഉപകരണമാക്കാനല്ല ആപ്പിളിന്റെ ശ്രമമെന്നാണ് ലഭ്യമായ വിവരങ്ങൾ സൂചിപ്പിക്കുന്നത്. ടച്ച് ഒരു അധിക സൗകര്യമായിരിക്കും. പ്രൊഫഷണൽ ഉപയോക്താക്കൾക്ക് കീബോർഡും ട്രാക്ക്പാഡും തുടർന്നും പ്രധാന നിയന്ത്രണമാർഗങ്ങളായിരിക്കും. വീഡിയോ എഡിറ്റിങ്, ഫോട്ടോ എഡിറ്റിങ്, സംഗീതനിർമാണം തുടങ്ങിയ മേഖലകളിലെ പ്രൊഫഷണലുകളെ പുതിയ ഉയർന്ന ശ്രേണി മാക്‌ബുക്ക് മോഡലുകൾ പ്രധാനമായും ലക്ഷ്യമിടുന്നു.
ഇനി കാത്തിരിക്കേണ്ടത് ഔദ്യോഗിക പ്രഖ്യാപനം
ഒക്ടോബർ 27ഓടെ പ്രഖ്യാപനം ഉണ്ടാകുമെന്നാണ് ഇപ്പോഴത്തെ വിവരം. എന്നാൽ ഈ പദ്ധതികൾ ആപ്പിൾ ഔദ്യോഗികമായി സ്ഥിരീകരിച്ചിട്ടില്ല. അതുകൊണ്ട് അവസാന നിമിഷത്തിൽ തീയതിയിലോ മോഡലുകളിലോ ചില മാറ്റങ്ങൾ ഉണ്ടാകാനുള്ള സാധ്യതയും നിലനിൽക്കുന്നു.
എന്നാൽ പുറത്തുവന്ന വിവരം യാഥാർഥ്യമായാൽ, 2026ലെ ആപ്പിളിന്റെ ഏറ്റവും പ്രധാനപ്പെട്ട ഹാർഡ്‌വെയർ മാറ്റങ്ങളിലൊന്നായിരിക്കും ഇത്. ഐഫോണിൽ സ്പർശം സ്വാഭാവികമാക്കിയ കമ്പനി 16 വർഷത്തെ മടി അവസാനിപ്പിച്ച് മാക്‌ബുക്കിന്റെ സ്ക്രീനിലേക്കും വിരൽത്തുമ്പിനെ ക്ഷണിക്കുകയാണ്.
