ഫ്രിഡ്ജ് എന്ന സാധനം കുട്ടിക്കാലത്ത് എനിക്കൊരു അത്ഭുതമായിരുന്നു.
എന്റെ വീട്ടില്‍ അതുണ്ടായിരുന്നില്ല.
ഒരു കൂട്ടുകാരന്റെ വീട്ടിലാണ് ഫ്രിഡ്ജ് ആദ്യമായി കാണുന്നത്.
അവിടെ പോകുമ്പോള്‍ തണുത്ത വെള്ളം കുടിക്കാനും ഐസ് കട്ട വായിലിട്ട് അലിയിക്കാനുമൊക്കെ കാണിച്ചിരുന്ന ആവേശം ഇന്നും മനസ്സിലുണ്ട്.
വീട്ടില്‍ ഫ്രിഡ്ജ് ഇല്ലാത്തതു കൊണ്ടു മാത്രം ലഭിച്ചിരുന്ന വിഭവങ്ങളാണ് പഴംകഞ്ഞിയും പഴംകൂട്ടാനും.
തലേദിവസം ബാക്കിയാവുന്ന ചോറ് വെള്ളമൊഴിച്ചു വെച്ചാല്‍ അടുത്ത ദിവസം രാവിലെ പഴംകഞ്ഞിയായി.
പഴംകൂട്ടാന്‍ അത്രയെളുപ്പമല്ല, സാധാരണനിലയില്‍ സദ്യയുടെ പിറ്റേന്നാളാണ് പഴംകൂട്ടാനുണ്ടാവുക.
സദ്യക്കു ശേഷം ബാക്കിയാവുന്ന സാമ്പാറും അവിയലും തോരനും കിച്ചടിയുമെല്ലാം ഒരുമിച്ചിട്ടിളക്കി അടച്ചുവെയ്ക്കും.
അടുത്ത ദിവസം രാവിലെ വളരെ നല്ല മണവും രുചിയുള്ള പഴംകൂട്ടാന്‍ തയ്യാര്‍.
അതിന്റെ രുചിയോര്‍ക്കുമ്പോള്‍ ഇപ്പോഴും വായില്‍ കപ്പലോടിക്കാനുള്ള വെള്ളമൂറും.
വീട്ടില്‍ ഫ്രിഡ്ജ് വന്നതോടെ ഇതെല്ലാം ഓര്‍മ്മയായി.
ചോറും കറിയുമെല്ലാം ഫ്രിഡ്ജില്‍ തന്നെ സൂക്ഷിക്കും.
തലേന്നു ബാക്കിയാവുന്ന ചോറും കറിയുമെല്ലാം അടുത്ത ദിവസവും ചോറും കറിയുമായി തന്നെ മുന്നിലെത്തിത്തുടങ്ങി.
അമ്മയോട് പ്രത്യേകം ശട്ടം കെട്ടിയാല്‍ മാത്രം ചിലപ്പോള്‍ പഴംകഞ്ഞി കിട്ടും.
അച്ചാറും തൈരും മുളകുചുട്ടതും മീന്‍ചാറുമെല്ലാമായി ഇടയ്ക്ക് അകത്താക്കും.
എങ്കിലും പഴംകൂട്ടാന്‍ ഇപ്പോഴും ഒരു സ്വപ്നമാണ്.
ചിലപ്പോഴൊക്കെ പഴംകഞ്ഞി കുടിക്കാന്‍ അതിയായ കൊതിയാവും.
തിരുവനന്തപുരം കിള്ളിപ്പാലത്ത് ഒരു പഴംകഞ്ഞിക്കടയുണ്ട്.
അവസരം കിട്ടുമ്പോഴൊക്കെ അവിടെപ്പോയി പഴംകഞ്ഞി തട്ടും.
അവിടത്തെ പഴംകഞ്ഞി വേറൊരു മിക്സാണ്, പ്രത്യേക രുചി.
അപ്പോഴും പഴംകൂട്ടാന്‍ എന്നത് സ്വപ്നമായി അവശേഷിക്കുന്നു.
ഈ ഓണക്കാലത്ത് സദ്യയുണ്ടാക്കാന്‍ പ്രകൃതി അവസരം തരികയാണെങ്കില്‍ പഴംകൂട്ടാന്‍ ഒന്നു പരീക്ഷിക്കണം.
പഴംകഞ്ഞിയെയും പഴംകൂട്ടാനെയും ഓര്‍മ്മകളിലേക്ക് വലിച്ചടുപ്പിചത് ഒരു വീഡിയോ ആണ്.
പ്രിയ സുഹൃത്ത് വാള്‍ട്ടര്‍ ഡിക്രൂസ് അയച്ചുതന്ന വീഡിയോ -കഞ്ഞി.
അദ്ദേഹത്തിന്റെ നേതൃത്വത്തില്‍ തയ്യാറാക്കുന്ന ഒരു വെബ് സിരീസിന്റെ ഭാഗമാണ്.
വാള്‍ട്ടറിന് നന്ദി.
“എടാ.. പഴംകഞ്ഞിക്കിത്രയും ടേസ്റ്റുണ്ടായിരുന്നാ” -ആ ഒറ്റ ഡയലോഗ് എന്നെ പിടിച്ചുലച്ചു.
പ്രചോദനം വരുന്ന വഴി നോക്കണേ..!!
