ലാപ്ടോപ്പില്‍ ഇന്റര്‍നെറ്റ് വലിയുന്നുണ്ടോ?

ലോക്ക്ഡൗണ്‍ കാലമായതിനാല്‍ ഓഫീസില്‍ പോയിരുന്ന ഭൂരിഭാഗം പേരും വീട്ടിലിരുന്ന് ജോലി ചെയ്യുകയാണ്. ടെക്കികളടക്കം പലര്‍ക്കും ഇതൊരു പുതുമയാണെങ്കിലും എനിക്ക് അങ്ങനെയല്ല. കാരണം പ്രത്യേകിച്ചൊരു സ്ഥാപനത്തിലും ജോലി ഇല്ലാത്തതിനാല്‍ വീട്ടിലിരുന്നു തന്നെയാണ് പണികള്‍ മുഴുവനും -ലോക്ക്ഡൗണായാലും അല്ലെങ്കിലും. ഒരു ലാപ്ടോപ്പും മൊബൈല്‍ ഫോണില്‍ നിന്ന് ടെതര്‍ ചെയ്യുന്ന ഇന്റര്‍നെറ്റുമാണ് പണിയായുധങ്ങള്‍. സാമാന്യം വേഗത്തില്‍ ഇന്റര്‍നെറ്റ് സേവനം ലഭിക്കുന്നതിനാല്‍ എഴുത്തു പണികള്‍ മോശമല്ലാതെ നടന്നുപോകാറുണ്ട്.

14 ഇഞ്ച് ടച്ച്‌സ്‌ക്രീന്‍, Intel Core i5 8250U പ്രൊസസര്‍, NVIDIA GeForce MX130 ഗ്രാഫിക്‌സ്, 512GB സോളിഡ് സ്‌റ്റേറ്റ് ഡ്രൈവ് (SSD), Active Pen സപ്പോര്‍ട്ട് -ഇതെല്ലാമടങ്ങുന്ന Lenovo YOGA 530 ആണ് കൈയിലുള്ളത്. Windows 10 64 bit ആണ് പ്രവര്‍ത്തകം. സാമാന്യേന വേഗത്തില്‍ പ്രവര്‍ത്തിക്കുന്ന യന്ത്രമാണ്. എന്നാല്‍, കഴിഞ്ഞ ദിവസങ്ങളില്‍ ഇതുവരെയില്ലാത്തവണ്ണം ഇന്റര്‍നെറ്റ് വലിഞ്ഞു തുടങ്ങി. 5 മിനിറ്റില്‍ ചെയ്തിരുന്ന പണി 50 മിനിറ്റു കൊണ്ടും തീരാതായി. ലോക്ക്ഡൗണ്‍ നിമിത്തം എല്ലാവരും വീട്ടിലിരുന്ന് ഇന്റര്‍നെറ്റ് ഉപയോഗിക്കുന്നതു കാരണമുണ്ടായ internet congestion ആയിരിക്കുമെന്നു കരുതി. എന്നാലും വേഗം കുറയുന്നതിന് ഒരു പരിധിയൊക്കെ വേണ്ടേ? അങ്ങനെയാണ് വേറെ വല്ല കാരണവുമുണ്ടോ എന്ന അന്വേഷണവുമായി ഇറങ്ങിയത്. അതിനു ഫലമുണ്ടായി. പ്രശ്നത്തിന് പരിഹാരം കണ്ടെത്തി.

വിന്‍ഡോസ് 10ല്‍ കടന്നുകൂടിയിട്ടുള്ള ചെറിയൊരു bug നിമിത്തം ഉപയോക്താക്കള്‍ക്ക് ഇന്റര്‍നെറ്റ് കണക്ടിവിറ്റിയില്‍ തടസ്സം നേരിടാനിടയുണ്ടെന്ന് ഒരാഴ്ച മുമ്പ് മൈക്രോസോഫ്റ്റ് മുന്നറിയിപ്പ് നല്‍കിയിരുന്നു. Microsoft Teams, Outlook, Office 365, Internet Explorer, Microsoft Edge എന്നിവയുടെ പ്രവര്‍ത്തനത്തെ ഇതു സാരമായി ബാധിക്കാനിടയുണ്ടെന്നും മൈക്രോസോഫ്റ്റ് അറിയിക്കുകയുണ്ടായി. ഏപ്രില്‍ ആദ്യ ആഴ്ച കഴിയുന്നതോടെ ഇതിനു പരിഹാരം കണ്ടെത്താനാണ് ശ്രമിക്കുന്നതെന്നും കമ്പനി അറിയിച്ചു.

ഇപ്പോള്‍ ലോകത്തു നിലനില്‍ക്കുന്ന ആരോഗ്യ അടിയന്തരാവസ്ഥയുടെ പശ്ചാത്തലത്തില്‍ കോടിക്കണക്കിനാളുകളാണ് ഓഫീസുകളില്‍ നിന്നു മാറി സ്വന്തം പാര്‍പ്പിടങ്ങളിലിരുന്ന് ജോലി ചെയ്യുന്നത്. ഇവരില്‍ വലിയൊരു ഭാഗം വിന്‍ഡോസ് 10 പ്രവര്‍ത്തകം ഉപയോഗിക്കുന്നവരാണ്. ഈ നിലയില്‍ ഇന്റര്‍നെറ്റ് കണക്ടിവിറ്റിയുമായി ബന്ധപ്പെട്ട പ്രശ്നപരിഹാരം വൈകുന്നത് ആത്മഹത്യാപരമാണെന്ന് മൈക്രോസോഫ്റ്റ് തിരിച്ചറിഞ്ഞു. അങ്ങനെ അവര്‍ പരിഹാരവുമായി വന്നു, നേരത്തേ പറഞ്ഞിരുന്നതിനും വളരെ മുമ്പ്.

ഇന്റര്‍നെറ്റ് കണക്ടിവിറ്റിയുമായി ബന്ധപ്പെട്ട പ്രശ്നങ്ങള്‍ പരിഹരിക്കുന്നതിന് Windows 10 KB4554364 എന്ന fix മാര്‍ച്ച് 31ന് മൈക്രോസോഫ്റ്റ് പുറത്തിറക്കി. ഇത് സാധാരണ വിന്‍ഡോസ് അപ്ഡേറ്റ് പാക്കേജിന്റെ ഭാഗമായി വരില്ല. ആവശ്യക്കാര്‍ നേരിട്ട് മൈക്രോസോഫ്റ്റ് അപ്ഡേറ്റ് കാറ്റലോഗില്‍ നിന്നു പരതിയെടുത്ത് തങ്ങളുടെ കമ്പ്യൂട്ടറില്‍ ഇന്‍സ്റ്റാള്‍ ചെയ്യേണ്ടി വരും.

ഫെബ്രുവരി 27ന് മൈക്രോസോഫ്റ്റ് പുറത്തുവിട്ട Windows 10 KB4535996 എന്ന അപ്ഡേറ്റ് മുതലാണ് പല വിധത്തിലുള്ള പ്രശ്നങ്ങള്‍ തുടങ്ങിയതെന്നാണ് കമ്പ്യൂട്ടര്‍ വിദഗ്ദ്ധരുടെ അഭിപ്രായം. ഇത് ആഗോളതലത്തില്‍ വ്യാപകമായ ചര്‍ച്ചയ്ക്ക് വഴിവെയ്ക്കുകയും പ്രസ്തുത അപ്ഡേറ്റ് കമ്പ്യൂട്ടറില്‍ നിന്നു നീക്കിയാല്‍ പ്രശ്നം പരിഹരിക്കാമെന്ന് കണ്ടെത്തുകയും ചെയ്തു. എന്നാല്‍, കമ്പ്യൂട്ടര്‍ ഉപയോഗിക്കുന്ന ഭൂരിഭാഗവും അതിന്റെ സാങ്കേതികകാര്യങ്ങള്‍ കൈകാര്യം ചെയ്യാന്‍ വിദഗ്ദ്ധരല്ല എന്നതിനാല്‍ Windows 10 KB4535996 എന്ന അപ്ഡേറ്റ് കണ്ടെത്തി നീക്കുക പ്രായോഗികമായിരുന്നില്ല. ഈ സാഹചര്യത്തിലാണ് അതിലെ പ്രശ്നങ്ങള്‍ പരിഹരിക്കാന്‍ Windows 10 KB4554364 അപ്ഡേറ്റ് മൈക്രോസോഫ്റ്റ് അവതരിപ്പിച്ചിരിക്കുന്നത്.

പ്രശ്നം പരിഹരിക്കാന്‍ Windows 10 KB4554364 ലഭിക്കുന്നതിന് ഇപ്രകാരം ചെയ്യുക. നിങ്ങളുടെ കമ്പ്യൂട്ടറിന് അനുയോജ്യമായ installation file കിട്ടണമെങ്കില്‍ അതിലുള്ള വിന്‍ഡോസ് പ്രവര്‍ത്തകത്തിന്റെ വിശദാംശങ്ങള്‍ കൈയിലുണ്ടാവണം. അത് ലഭിക്കാന്‍ നിങ്ങളുടെ കമ്പ്യൂട്ടറില്‍ Settings > System > About നോക്കുക. അതില്‍ നിങ്ങളുടെ വിന്‍ഡോസ് പ്രവര്‍ത്തകം 32 bit ആണോ 64 bit ആണോ എന്നറിയാം.

• മൈക്രോസോഫ്റ്റ് അപ്ഡേറ്റ് കാറ്റലോഗ് വെബ്സൈറ്റില്‍ കയറുക.
• KB4554364 പരതുക.
• നിങ്ങളുടെ വിന്‍ഡോസ് പ്രവര്‍ത്തകത്തിന് അനുയോജ്യമായ (32 / 64 bit) ഫയല്‍ ഡൗണ്‍ലോഡ് ക്ലിക്ക് ചെയ്യുക.
• ഫയല്‍ നിങ്ങളുടെ കമ്പ്യൂട്ടറില്‍ എത്തിക്കഴിയുമ്പോള്‍ ആ Microsoft Update Standalone Package (.msu) ഫയല്‍ ക്ലിക്ക് ചെയ്ത് ഇന്‍സ്റ്റാള്‍ ചെയ്യുക.
• ഇന്‍സ്റ്റലേഷന്‍ പൂര്‍ത്തിയാകുമ്പോള്‍ കമ്പ്യൂട്ടര്‍ റിസ്റ്റാര്‍ട്ട് ചെയ്യുക.

ആകെ 357 മെഗാബൈറ്റാണ് Windows 10 KB4554364 അപ്ഡേറ്റിന്റെ വലിപ്പം. അതിനാല്‍ വേഗം കുറഞ്ഞ ഇന്റര്‍നെറ്റായാലും ഡൗണ്‍ലോഡ് ചെയ്യാന്‍ അധികസമയം വേണ്ടി വരില്ല. ഈ അപ്ഡേറ്റ് ഇന്സ്റ്റാള്‍ ചെയ്യുന്നതോടെ കമ്പ്യൂട്ടറിലെ ഇന്റര്‍നെറ്റ് കണക്ടിവിറ്റി പ്രശ്നം പരിഹരിക്കപ്പെട്ടിട്ടുണ്ടാവും. എനിക്കുണ്ടായിരുന്ന പ്രശ്നം പരിഹരിച്ചു. ആവശ്യമുള്ളവര്‍ക്ക് ഈ വിദ്യ പ്രയോജനപ്പെടുത്താം.