ഇന്ത്യൻ പ്രീമിയർ ലീഗ് ചരിത്രത്തിലെ ഏറ്റവും ദീർഘവും വിജയകരവുമായ പരിശീലകബന്ധങ്ങളിൽ ഒന്നിന് വിരാമം. ചെന്നൈ സൂപ്പർ കിങ്സും മുഖ്യപരിശീലകൻ സ്റ്റീഫൻ ഫ്ലെമിങ്ങും പരസ്പര ധാരണപ്രകാരം വഴിപിരിയാൻ തീരുമാനിച്ചു. ഇതോടെ സി.എസ്.കെ.യുടെ ഭാവി നേതൃത്വത്തെക്കുറിച്ചുള്ള ചർച്ചകളും ശക്തമായി. ഫ്ലെമിങ്ങിൻ്റെ പകരക്കാരനായി മഹേന്ദ്ര സിങ് ധോണി പുതിയ ചുമതലയിലേക്ക് വരുമോ എന്നതാണ് ആരാധകർക്കിടയിലെ ഏറ്റവും വലിയ ചോദ്യം.
ഫ്ലെമിങ്ങും സൂപ്പർ കിങ്സ് മാനേജ്മെൻ്റെും തമ്മിൽ നടന്ന ചർച്ചകൾക്കൊടുവിലാണ് തീരുമാനം. പരസ്പര ബഹുമാനവും നന്ദിയും നിലനിർത്തിയാണ് ഇരുപക്ഷവും വേർപിരിയുന്നതെന്ന് ഫ്രാഞ്ചൈസി അറിയിച്ചു. ഔദ്യോഗികമായി പുതിയ മുഖ്യപരിശീലകനെ പ്രഖ്യാപിച്ചിട്ടില്ല. അതുകൊണ്ടുതന്നെ, ചെന്നൈയുടെ അടുത്ത അധ്യായത്തിൽ ധോണിയുടെ പങ്ക് എന്തായിരിക്കുമെന്ന ചോദ്യമാണ് ഇപ്പോൾ ക്രിക്കറ്റ് വൃത്തങ്ങളിൽ ഉയരുന്നത്.
2008ൽ ഐ.പി.എല്ലിൻ്റെ ആദ്യ സീസണിൽ ചെന്നൈ സൂപ്പർ കിങ്സ് താരമായാണ് ഫ്ലെമിങ് ടീമിനൊപ്പം ചേർന്നത്. 2009 മുതൽ അദ്ദേഹം ടീമിൻ്റെ മുഖ്യപരിശീലകനായി. തുടർന്നുള്ള 17 വർഷങ്ങളിൽ സി.എസ്.കെയെ ഫ്രാഞ്ചൈസി ക്രിക്കറ്റിലെ ഏറ്റവും സ്ഥിരതയാർന്ന ടീമുകളിലൊന്നാക്കി മാറ്റുന്നതിൽ ഫ്ലെമിങ്ങിന് നിർണായക പങ്കുണ്ടായി. അദ്ദേഹത്തിൻ്റെ കാലത്ത് ചെന്നൈ അഞ്ച് ഐ.പി.എൽ. കിരീടങ്ങളും രണ്ട് ചാമ്പ്യൻസ് ലീഗ് ട്വൻ്റി 20 കിരീടങ്ങളും നേടി. 12 തവണ ടീം പ്ലേ ഓഫിലെത്തുകയും 10 ഐ.പി.എൽ. ഫൈനലുകളുടെ ഭാഗമാവുകയും ചെയ്തു.
ഫ്ലെമിങ് വിടപറയുമ്പോൾ സി.എസ്.കെയ്ക്കു മുന്നിലുള്ള ചോദ്യം ഒരു പരിശീലകനെ കണ്ടെത്തുക എന്നതിൽ മാത്രം ഒതുങ്ങുന്നില്ല. വർഷങ്ങളോളം ഫ്ലെമിങ്–ധോണി കൂട്ടുകെട്ട് നിർമിച്ചെടുത്ത ടീം സംസ്കാരം ഇനി ആരുടെ കൈകളിൽ സുരക്ഷിതമാകും എന്നതാണ് പ്രധാന വിഷയം. കളിക്കളത്തിൽ ധോണിയും ഡഗൗട്ടിൽ ഫ്ലെമിങ്ങും ചേർന്ന് സൃഷ്ടിച്ച ശാന്തതയും കൃത്യതയും വിശ്വാസവുമാണ് ചെന്നൈയെ മറ്റു ഫ്രാഞ്ചൈസികളിൽ നിന്ന് വേറിട്ട് നിർത്തിയത്. അതുകൊണ്ടുതന്നെ ഫ്ലെമിങ്ങിൻ്റെ പടിയിറക്കം ധോണിയുടെ പുതിയ വേഷത്തെക്കുറിച്ചുള്ള ചർച്ചകൾക്ക് സ്വാഭാവികമായി വഴിതുറക്കുന്നു.
ഫ്ലെമിങ്ങിൻ്റെ പടിയിറക്കം സി.എസ്.കെ.യുടെ പരിശീലകസംഘത്തിൽ വലിയ മാറ്റങ്ങൾക്ക് തുടക്കമാകുമെന്ന സൂചനകളും ഉണ്ട്. മുൻ ഇന്ത്യൻ താരം ഹേമാങ് ബദാനി പരിശീലകസംഘത്തിലേക്ക് വരാനുള്ള സാധ്യതയുണ്ടെന്ന റിപ്പോർട്ടുകളും പുറത്തുവന്നിട്ടുണ്ട്. എന്നാൽ, ഫ്ലെമിങ്ങിൻ്റെ നേരിട്ടുള്ള പകരക്കാരനെക്കുറിച്ച് ഫ്രാഞ്ചൈസി ഔദ്യോഗികമായി ഒന്നും വ്യക്തമാക്കിയിട്ടില്ല.
അതിനാൽ തന്നെ ധോണിയുടെ പേരാണ് ആരാധകരുടെ മനസ്സിൽ ആദ്യം ഉയരുന്നത്. ക്യാപ്റ്റനെന്ന നിലയിൽ ചെന്നൈയുടെ മുഖമായിരുന്ന ധോണി, ഫ്ലെമിങ്ങിനൊപ്പം ചേർന്ന് ടീമിൻ്റെെ വിജയസംസ്കാരം പടുത്തുയർത്തിയ വ്യക്തിയാണ്. കളിക്കാരനായി, നായകനായി, ഉപദേശകനായി — ഏത് രൂപത്തിലായാലും സി.എസ്.കെയുടെ ആത്മാവിനോട് ഏറ്റവും ചേർന്ന് നിൽക്കുന്ന പേരാണ് ധോണി. അതുകൊണ്ട് ഫ്ലെമിങ് ഒഴിയുമ്പോൾ ധോണി കൂടുതൽ സജീവമായ പരിശീലക/മെൻ്റെർ റോളിലേക്ക് മാറുമോ എന്ന ചോദ്യത്തിന് വലിയ പ്രസക്തിയുണ്ട്. ഇക്കഴിഞ്ഞ സീസണിൽ ധോണി കളിക്കാരനെന്ന നിലയിൽ ടീമിൻ്റെ ഭാഗമായിരുന്നുവെങ്കിലും ഒറ്റ മത്സരത്തിൽ പോലും കളത്തിലിറങ്ങിയിരുന്നില്ല.
തൻ്റെ വിടവാങ്ങൽ സന്ദേശത്തിൽ സി.എസ്.കെ.യോടുള്ള നന്ദി സ്റ്റീഫൻ ഫ്ലെമിങ് രേഖപ്പെടുത്തി. “കായികരംഗത്ത് 18 വർഷം എന്നത് ഒരു ജീവിതകാലം തന്നെയാണ്. ഞാൻ മടങ്ങുന്നത് നന്ദിയോടെ മാത്രമാണ്. ചെന്നൈ സൂപ്പർ കിങ്സിനൊപ്പമുള്ള എൻ്റെ കാലം എൻ്റെ പരിശീലകജീവിതത്തിലെ ഏറ്റവും വലിയ ബഹുമതിയായിരുന്നു. നാം നേടിയ എല്ലാത്തിലും ഞാൻ അഭിമാനിക്കുന്നു,” ഫ്ലെമിങ് പറഞ്ഞു.
“ഒരുമിച്ച് നാം മറക്കാനാവാത്ത വിജയങ്ങൾ ആഘോഷിച്ചു. കഠിനമായ ഘട്ടങ്ങളെ അതിജീവിച്ചു. എന്നും എന്നോടൊപ്പം നിലനിൽക്കുന്ന ഓർമ്മകൾ പടുത്തുയർത്തി. സി.എസ്.കെ. എപ്പോഴും എൻ്റെെ ഹൃദയത്തോട് ചേർന്നിരിക്കും. വരും വർഷങ്ങളിലും ഞാൻ ടീമിനായി കൈയടിച്ചുകൊണ്ടിരിക്കും,” അദ്ദേഹം കൂട്ടിച്ചേർത്തു.
ഫ്ലെമിങ്ങിൻ്റെെ പടിയിറക്കത്തോടെ ചെന്നൈ സൂപ്പർ കിങ്സ് ചരിത്രത്തിലെ ഒരു സുവർണ അധ്യായത്തിനാണ് തിരശ്ശീല വീഴുന്നത്. ഇനി തുടങ്ങുന്നത് പുതിയ അധ്യായമാണ്. ആ അധ്യായത്തിൻ്റെെ തലക്കെട്ടിൽ ധോണിയുടെ പേരുണ്ടാകുമോ എന്നതാണ് ആരാധകർ കാത്തിരിക്കുന്ന ചോദ്യം.
